Tónleikar píanódeildar Tónlistarskóla Eyjafjarðar verða haldnir í Laugarborg annað kvöld, þriðjudaginn 2. mars, kl. 20.30 Þar koma fram 12 nemendur úr píanódeildinni, þeir sem lengst eru komnir í náminu. Einnig kemur fram gestanemandi úr Tónlistarskóla Akureyrar. Allir eru velkomnir og aðgangur ókeypis.
Farið var í tónleikaferð til Dalvíkur s.l. föstudag og haldnir sameiginlegir tónleikar með nemendum Tónlistarskóla Dalvíkur. 10 nemendur úr TE áttu að leika á tónleikunum en á síðustu stundu forfölluðust 3 þannig að aðeins 7 nemendur komu fram. Þeir stóðu sig allir með prýði og voru tónleikarnir í heild virkilega skemmtilegir og gaman að þessu samstarfi með Dalvíkingum, sem meiningin er að verði framhald á.
Á döfinni er Uppskeruhátíð tónlistarskólanna, „Nótan“ . Okkar skóli mun senda 3 atriði á hátíðina, en skólunum er skammtaður tími eftir nemendafjölda og hlaut TE 11 mínútur til umráða. Tvennir tónleikar verða í Ketilhúsinu á Akureyri 13. mars n.k. þar sem fram koma nemendur úr hinum ýmsu skólum á norður- og austurlandi. Ástæða er til að hvetja fólk til að mæta á tónleikana og njóta.